Պոլիտեխնիկական ինստիտուտի ճարտարապետական բաժնի առաջին կուրսում մեր լսարանը մտավ բարձրահասակ, համակրելի, գեղեցիկ կեցվածքով մի երիտասարդ և փոքր-ինչ ռնգային, հաճելի բարիտոնով ասաց. «Ես ձեզ պատմելու եմ իտալական Վերածննդի ճարտարապետության մասին»: Ինչպես հարկն է` պատրաստ ունեինք տետրակներ և մատիտներ` դասախոսությունը սղագրելու համար, բայց մեզ վիճակված չէր օգտագործելու դրանք:
Հմայված և կախարդված երիտասարդ դասախոսի առաջին իսկ խոսքերից` «հայտնվեցինք» Վերածննդի հրաշալի իրականության մեջ: Այդ երիտասարդը Ջիմ Թորոսյանն էր: Նա զուգահեռներ էր անցկացնում ճարտարապետական օրինակների և Մոցարտի երաժշտության մեջ, պատմում էր այդ ժամանակների ստեղծագործական միջավայրի մասին: Ջիմ Թորոսյանի արտիստիզմը և գիտելիքների լայն դիապազոնը մեզ ընդմիշտ կապեց իր անձնավորության հետ: Ուսանողությունը սիրահարված էր նրան: Բարձր կուրսի աղջիկները գալիս էին լսարանի դռնից թաքուն տեսնելու Ջիմին:
Մեր առաջին ուսումնական նախագծի, ինչպես նաև հետագա գրեթե բոլոր նման աշխատանքների ժամանակ ինձ բախտ վիճակվեց աշխատել նրա ղեկավարությամբ: Առաջին անգամ, երբ ցույց տվեցի իմ արած պարզունակ և միօրինակ էսքիզները, նա ասաց. «Պատկերացրու, թե ինչ վայրում է նախատեսվում կառույցը` անտառի եզրին, սարի ստորոտում, ճանապարհի խաչմերուկում, գետի ափին, քաղաքային բանուկ փողոցի վրա… դա քեզ կթելադրի ստեղծվելիք շենքի կերպարը և ճարտարապետական ձևերը»: Դա ես ընդունեցի որպես ճարտարապետության առաջին կանոն, այն է` կառույցը պետք է լինի միջավայրի ծնունդը և նրա մասնիկը: Ջիմ Թորոսյանը իր զրույցների ընթացքում մեր գիտակցության մեջ մտցնում էր այն գաղափարը, թե ճարտարապետությունը մարդկային ցանկացած գործունեության համար միջավայր ստեղծելու արվեստ է:
Մեր ծանոթությունը և կապը ինստիտուտից հետո երբեք չընդհատվեց: Ես կարիք ունեի ժամանակ առ ժամանակ լինել Թորոսյանի ղեկավարած արվեստանոցում, որտեղ տիրող ստեղծագործական բարձր մթնոլորտը հրապուրում էր ինձ: Նրա արվեստանոցում աճեցին բազմաթիվ տաղանդավոր ճարտարապետներ` Ռոմիկ Ջուլհակյանը,
Իզա Չոլախյանը, Գևորգ Արամյանը, Ռազմիկ Մինասյա- նը, Շոկորև Օլեգը, Ասլան Մխիթարյանը, որոնք իրենց ուսուցչի և ավագ կոլեգայի հետ իրականացրեցին բազմաթիվ աչքի ընկնող ճարտարապետական գործեր:
Հիշում եմ` մի անգամ, հավանաբար 70-ական թվականներին, Երևաննախագիծ ինստիտուտում մինչև ուշ երեկո աշխատելուց հետո դեպի տուն էի ուղեկցում մեր արվեստանոցի ճարտարապետ Ժաննա Մեշչերյակովային: Այդ ժամին ավտոբուսի կանգառի մոտով տուն էր գնում Ջիմ Թորոսյանը: Մեզ տեսնելով մոտեցավ: Մի փոքր զրուցելուց հետո հարցրեց. «Պետրոս, իսկ դու՞ ինչ ես անում»: Հավանաբար նկատի ուներ, թե ինչի վրա եմ աշխատում: Ես կատակով պատասխանեցի, որ Ժաննային տուն եմ ուղեկցում: Նա ընդունելով կատակը ասաց, թե ինքն է Ժաննային ուղեկցելու: Ժաննան «հաշտեցրեց» մեզ, երկուսիս հրավիրելով իր տուն թեյ խմելու: Այդ անմոռանալի երեկո ուսուցիչը այնպիսի հրաշալի պատմություններ պատմեց մեզ Իտալիայում ապրած տասը ամիսներից, այնպես կենդանի և գունեղ նկարագրեց Իտալիայի մեծ ու փոքր քաղաքները, մարդկանց և միջավայրը, որ կարծես արդեն եղել էինք այնտեղ:
Շատ տարիներ հետո մի քանի անգամ եղա Իտալիայում: Ինձ թվաց, թե, այնտեղ ամեն ինչ` Ֆլորենցիայի նեղլիկ փողոցների վրա բարձրացած Սանտա Մարիա Դել ֆիորե եկեղեցու արտերկրային թվացող գմբեթը, Անունցիատա հրապարակի Բռունելեսկիի կամարաշարը, Պալացո Մեդիչի Ռիկարդին, Պոնտե վեգիո կամուրջը վաղուց արդեն տեսել եմ ուսուցչիս հետ միասին և ի՛ր աչքերով:
Տարիների ընթացքում մեր կապն ավելի ջերմացավ և մտերիմ դարձավ:
Վերջին տասը տարիներին աշխատում էի Մոսկվայում և հաճախ էի լինում ԽՍՀՄ, Հայաստանի և Ռու-սաստանի ժողովրդական նկարիչ, Ռուսաստանի Գեղարվեստի Ակադեմիայի ակադեմիկոս Նիկոլայ Նիկողոսյանի արվեստանոցում: Մեծ քանդակագործը և արվեստագետը ջերմությամբ էր վերաբերում իր վաղեմի ընկերոջը` Ջիմ Թորոսյանին: Նրանք միասին Երևանում իրականացրել էին Միքայել Նալբանդյանի, Եղիշե Չարենցի, Գյումրիում` Ավետիք Իսահակյանի հուշարձանները, որոնց համար ստացել էին պետական մրցանակներ: Մեծ քանդակագործը պատմում էր իրենց համատեղ աշխատանքների մասին, թե ինչպես ամեն անգամ, միասին փորձում էին հասնել քանդակի եվ ճարտարապետության լիակատար միասնության, նպատակ ունենալով դրանք ներդաշնակելու միջավայրի հետ:
Տարվա ընթացքում երկու անգամ Մոսկվայից գալիս էի Երևան: Առաջին այցելությունս բերում էի իմ ուսուցչին, սկզբից գնում էի արվես- տանոց, իսկ հետո հյուրընկալվում էի նրա տանը: Պետք է ասեմ, որ այդ տունը, Թամանյանների և Ռաֆայել Իսրայելյանի օջախների հետ միասին ինձ համար եղե՛լ է, կմնա՛ պարզության և կատարելության օրի- նակ, օջախներ, որտեղ իշխում էր ազնվականությունն ու արվեստով հագեցված մթնոլորտը:
Ինձ համար անմոռանալի հունվարյան, զարմանալիորեն տաք մի օր Վարպետի հետ նստած էինք նրա բնակարանի պատշգամբում և վայելում էինք տիկին Մարգոյի հյուրասիրությունը: Ուսուցիչը խոսեց Էջ- միածնում իր կառուցած եկեղեցու մասին, և, երբ ասացի, որ ծանոթ եմ միայն նախագծին իսկ տաճարը տեսել եմ հեռվից, անմիջապես առաջարկեց գնալ և մոտիկից տեսնել այն: Տղայիս մեքենայով գնացինք Էջմիածին: Ճանապարհին պատմեց, թե ինչպես Վեհափառ Հայրապետ Գարեգին Երկրորդը նրան առաջնորդել է դեպի այդ տեղը, և ասել է. «Այստե՛ղ պետք է լինի»: Ճարտարապետը կարկամած լռել է, Վեհափառը դիմել է նրան, ասելով. «Ի՞նչ է, տեղը չե՞ս հավանում»: Հետևում է Ջիմ Թորոսյանի պատասխանը. «Դարեր շարունակ Էջմիածնի հողի վրա ուրիշ տաճար չի կառուցվել, միթե՞ այդ պատիվը ինձ է տրվելու»:
Ջիմ Պետրովիչը շինարարության ընթացքի մասին խոսելիս անընդհատ հիշատակում էր ոմն Գագիկի: Միայն հետո իմացա, որ Գագիկ Գալստյանը այս եկեղեցու միանձնյա բարերարն է և իր շինարարական կազմակերպության միջոցով կառուցել է եկեղեցին` հիմքից մինչև վերջին քանդակը: Նա ճարտարապետի պատմելով անտրտունջ կատարում էր շինարարության ընթացքում առաջացած բոլոր փոփոխությունները, ինչ կապված էր նյութական և դրամական գերածախսերի հետ: Այսպես` նա ընդառաջում էր ճարտարապետի` եկեղեցին կատարելության հասցնելու ձգտմանը: Ավելի ուշ իմացա, որ Գագիկը եղել է վարպետի վերջին տարիների բոլոր կառույցների շինարարը (Երևանի քաղաքապետարանի շենքը, Էջմիածնի մուտքի կոթողը. բաց խորանը, մկրտարանը և այլն):
Երբ տեղ հասանք, Ջիմ Պետրո- վիչը հաճույքով ցույց տվեց մեզ կառույցը, որը չհակասելով եկեղեցու շինարարության ավանդական կանոններին, անշուշտ, նորություն է հայկական եկեղեցաշինության մեջ. այն տարբերվում է դասական օրինակներից: Թերևս այդ պատճառով է, որ ոմանց համար կառույցը հասկանալի չէ և այնքան էլ դուր չի գալիս: Բայց շատերի մոտ, ըստ եկեղեցում աշխատող տիկին Ազնիվի ասածի, այն հիացմունք է առաջացնում: Այդ հրաշալի օրը մենք այցելեցինք նաև Վարպետի և Ռ. Ջուլհակյանի հեղինակած տաճար-մկրտարանը: Այդ ևս, ես համարում եմ մեր ճարտարապետության գլուխ-գործոցներից մեկը: Վեհափառ Հայրապետ Գարեգին Երկրորդը այս եր- կու տաճարները համարում է իր հայրապետության զարդերը:
Մեր ուսուցիչը ճանաչված ու սիրված էր ոչ միայն Հայաստանում, ջերմ ընկերական կապեր ուներ Մոսկվայի շատ ճարտարապետների Պլատոնովի, Աբդուլլա Ահմետովի, Կրասիլնիկովի հետ: Վերջինիս և Գևորգ Արամյանի հետ նախագծել էր Երևանի նոր կրկեսի շենքը: Գրեթե ընտանեկան բարեկամություն ուներ Վրաստանի ճարտարապետներ Թամազ Թեվզաձեի, Բաթիաշվիլիի, Վախթանգ Դավիթայայի հետ: Վրացի ճարտարապետները հայ արվեստակիցներին ուղղված իրենց ցավակցության մեջ, նշելով Ջիմ Թորոսյան ճարտարապետի միջազգային մեծությունը, արևելյան անմիջականությամբ գրել են. «Դուք դեռ չեք զգում, թե ինչ եք կորցրել»:
Ջիմ Թորոսյանը բազմակողմանի հետաքրքրություններ ուներ: Բոլորին հայտնի են Իտալիայում և այլուր արված նրա հրաշալի ջրաներկ և գրաֆիկ աշխատանքները: Գիտեր և սիրում էր դասական երաժշտությունը: Իր կյանքի ամենանշանակալից և երջանիկ դեպքերից մեկը համարում էր ռուս կոմպոզիտոր Պրոկոֆևի հետ պատահական հանդիպումը և շարունակված ծանոթությունը:
Ջիմ Թորոսյանը ուներ մտավորականներից և արվեստագետներից կազմված մտերիմների մի խումբ, որի մեջ մտնում էին ճարտարապետ Սարգիս Գյուրզադյանը, նկարիչներ Հակոբ Հակոբյանը, Սարգիս Մուրադյանը… Նրանք կիսում էին իր հայացքներն ու համոզմունքները: Նա մեծահոգի էր և պատրաստ էր օգնելու բոլորին, ով դիմում էր իրեն: Ուներ որոշակի կարծիք մարդկանց մասին, բայց ես երբեք չեմ լսել նրա կողմից որևէ մեկի հասցեին ասված վատ խոսք:
Մեր վերջին հանդիպումների ժամանակ ցավով տեսնում էի, որ վարպետը գնալով թուլանում է: Աչքերը ավելի ու ավելի վատ էին տեսնում: Սիրտս ճմլվում էր, երբ տեսնում էի, թե ինչպես փորձում էր նայել որևէ գծագրի կամ էսքիզի վրա, դրանք աչքերին մոտեցնելով: Ցավալի և հուզիչ էր տեսնել, թե ինչպես է շարունակում աշխատել վարպետը: Առանց իր աշակերտ Էրիկ Օհանյանի օգնության նա այլևս չէր կարողանում ավարտել գծագրերը:
Ուներ միայն մի քանի մտերիմներին հայտնի, մի վերջին նվիրական ցանկություն, այն է` Վան քաղաքում կառուցել եկեղեցի: Այդ գաղափարը Վեհափառի կողմից ջերմորեն ընդունվել և խրախուսվել էր: Դժբախտաբար, այդ նախագիծը չիրականացավ:
Այսօր Ջիմ Թորոսյանի աճյունը, ըստ արժանվույն, ամփոփված է հայկական պանթեոնում, մեր ազգի մեծերի կողքին:
Պետրոս ԱԲԱՋՅԱՆ
Ճարտարապետ
При полном или частичном использовании материалов ссылка на газету "Армянская Церковь" обязательна, при цитировании статьи в интернет-ресурсах гиперссылка на //armenianchurch.do.am обязательна.
Категория: Статьи |