 Երեւանի Ժամանակակից արվեստի թանգարանի ցուցասրահում այսօրվանից իշխում են "Ջավախքի գույները": "Ջավախք հայրենակցական միության" կազմակերպած հերթական ցուցահանդեսին ներկայացված են գեղանկարներ ու գրաֆիկական աշխատանքներ, նաեւ քանդակներ:
Ցուցահանդեսին ներկա ջավախահայ նկարիչների ամենամեծ մտահոգությունն այն է, որ հնարավորություն չեն ունեցել Երեւան բերել իրենց կտավները: Ներկայացված աշխատանքների մեծ մասը Երեւանում էին՝ դեռ նախորդ ցուցահանդեսից:
Հայրենի եզերքը պատկերելու համար Ջավախքի նկարիչներն օգտագործում են գունապնակի վառ բոլոր գույները:
"Առաջին տպավորությունս ինձ համար եղավ Ջավախքում հայտնվելն՝ այս նկարների միջոցով, քանի որ արդեն երրորդ տարին է՝ չեմ կարողանում հայրենիք գնալ: Ինձ համար հատկապես շատ հոգեհարազատ են Ջավախքի բնապատկերները",- ասաց Շիրակ Թորոսյանը՝ "Ջավախք հայրենակցական միության" նախագահը։
Միության նախագահի համար հարազատ Ջավախքը երկու գույն ունի՝ ձմռանն աչք ծակող սպիտակն է, ամռանը՝ թավշյա կանաչ գույնն է, որն ուղղակի հոգի է լցնում:
Ջավախքում եւ Թբիլիսում նման ցուցահադեսներ պարբերաբար կազմակերպվում են: Երեւանում ջավախահայերը 4-րդ անգամ են ներկայանում: Այս ցուցահանդեսին պրոֆեսիոնալ նկարիչների կողքին ներկայացված են նաեւ Երեւանի Գեղարվեստի ակադեմիայի ջավախքցի ուսանողների աշխատանքներ: Ջավախքի նկարիչների միության նախագահ Կառլեն Կարապետյանն, օրինակ, չի կարողացել Հայաստան բերել իր կտավները:
"Մաքսատանը նկարներ անցկացնելը դժվարությունների հետ է կապված, նկարների մեծ մասը Երեւանում եղածներ են",- ասաց Կառլեն Կարապետյանը։
Ջավախքի նկարիչների միությունը գործում է անցյալ տարվանից` Ջավախքի Գեղարվեստի դպրոցի շենքում: Միությունը շատ անդամներ չունի, միայն Ախալքալակում 4 պրոֆեսիոնալ նկարիչ կա, Բոգդանովկայում` մեկը: Կառլեն Կարապետյանի խոսքով` թեեւ աջակիցներ չունեն, բայց մշակույթը շարունակում է համախմբել խնդիրների տակ կքած ջավախահայերին: Իսկ երեւանյան ցուցահանդեսն այստեղ ապրող ջավախքցիների համար մշակութային իրադարձություն լինելուց զատ, առավելապես հոգու տոն է։ yerkirmedia.am
|
