ԵՐԵԿՈ, ՈՐ ՆՈՐՈԳԵՑ ՄԵՐ ՈՒԽՏԸ | Апрель 2013
 …
«Ռեքվիեմ հավերժական»՝ այսպես էր կոչվում ապրիլի 21-ին անցկացվող Հայոց Մեծ եղեռնի միլիոնավոր անմեղ զոհերի անմոռաց հիշատակին նվիրված գրական- երաժշտական երեկոն, որի լեյտմոտիվը միջոցառման հեղինակի՝ Անահիտ Թորոսյանի գեղեցիկ մտահղացմամբ հենց չարենցյան անմահ տողերն էին՝ նվիրված Կոմիտասին, համեմված կոմիտասյան մեղեդիներով:
«Հայորդյաց տան» դահլիճում հավաքված հանդիսատեսը այդ երեկո հուզվելու, խորհելու, տխրելու, հպարտանալու լուսավոր շատ պահեր ապրեց: Մեկը մյուսին հաջորդում էր ավագ դասարանի աշակերտներ Էրիկի, Գայանեի, Քնարայի, Ալիկի, Գրիգորի, Արևիկի, Աննա Ռաշոյանի, Աննա Հովհաննիսյանի, Թերեզայի, Հրաչյայի, Սոնայի, Մարիամի դինամիզմով հագեցված ոգեշունչ ասմունքը: Զգացվում էր, որ նրանցից յուրաքանչյուրը ամենայն անկեղծությամբ զգում է պոետի վիշտը, կիսում նրա ապրումները: Գեղեցկությունը թվացյալ սղության և լակոնիզմի մեջ է՝ կասեն շատ շատերը: Այս հոյակապ ներկայացման մեջ ոչ մի ավելորդություն չկար: Երեկոն վավերացրեց լարային նոր, գողտրիկ քառյակի ծնունդը, որի երիտասարդ անդամները՝ Չայկովսկու անվան կոնսերվատորիային կից երաժշտական քոլեջի ուսանող, «Կոմիտասի գործերի լավագույն կատարող» մրցույթի մրցանակակիր Հարություն Փիլոյանը՝ առաջին ջութակ, Չայկովսու անվան պետական կոնսերվատորիայի ուսանողուհի Աստղիկ Սարդարյանը՝ երկրորդ ջութակ, Չայկովսկու անվան կոնսերվատորիայի ուսանողներ Իլյա Չխաիձեն՝ ալտ, և Սերգեյ Բուլգադարյանը՝ թավջութակ, ընդամենը մի քանի փորձերի ընթացքում այնքան էին մտերմացել կոմիտասյան մեղեդիների հետ, որ որոշել են այսուհետ հանդես գալ միասնական լարային կվարտետի կազմում, որ կրում է «Վաղարշապատ» անունը:
Համերգն իրենց վոկալ կատարողական արվեստով զարդարեցին նաև միջազգային մրցույթների դափնեկիրներ, Մոսկվայի Չայկովսկու անվան կոնսերվատորիայի ուսանողուհի Էմմա Առաքելյանը, Միքայել Հայրապետյանը Գնեսինների ակադեմիայի ուսանողուհի Գոհար Ֆարաջյանը, ինչպես նաև Գարեգին Գրիգորյանը:
«Իմ հոգու պարտքն էր բեմ հանել մեծն Չարենցի «Ռեքվիեմը», որ ունի յուրօրինակ մի խորհուրդ. պոետն այն թեև ձոնել է Վարդապետին, բայց մեր ընկալմամբ տաղանդավոր այս տողերը բառաստեղծ հուշարձանն են նաև եղեռնազոհ արևմտահայ մտավորականության խնկելի հիշատակին, իր՝ Եղիշե Չարենցի, Ակսել Բակունցի, ում վիճակվեց նույն ճակատագիրը. դահիճներն էին ուրիշ…»,- երեկոյի ավարտից հետո ասաց Անահիտ Թորոսյանը:
«Այս երեկոն նորոգեց մեր ուխտը, ընդգծեց , որ այն, ինչ մեր ժողովրդի հետ կատարվեց անցյալ դարի առաջին քսանամյակում, մոռանալ չի լինի»,- երախտիքի իր խոսքում ասաց Հոգեշնորհ Հայր Սուրբը՝ Պողոս աբեղա Վարդարյանը:
Դահլիճում երկար ժամանակ չէին լռում ծափահարությունները:
Ռիմա ՄՈՒՐԱԴՅԱՆ
При полном или частичном использовании материалов ссылка на газету "Армянская Церковь" обязательна, при цитировании статьи в интернет-ресурсах гиперссылка на //armenianchurch.do.am обязательна.
Категория: Статьи |
Всего комментариев: 0 Просмотров: 746
Читайте также:
| |
|
|
|
|
Добавлять комментарии могут только зарегистрированные пользователи. [ Регистрация | Вход ] |
