Суббота, 26.09.2020, 07:20Наша страница в FaceBook|RSS
 
  |Сайт епархии|Архив материалов
Главная » Архив материалов » Статьи

ՔԱՆԶԻ Ի ՍՄԱ ԾԱԳԵԱՑ ՄԵԶ ԼՈՅՍ Ի ՀԱՅԱՍՏԱՆ ԱՇԽԱՐՀԻ… | Август 2011

Հայոց Հայրապետը բոլորեց իր ծննդյան 60 տարին, բոլորովին մոտ է գահակալության 12-րդ տարեդարձը: Հայ ժողովուրդը այս օրերին տոնեց իր անկախ պետականության` Հայաստանի Հանրապետության 20-ամյա հոբելյանը: Նախախնամության տնօրինությամբ` անհրաժեշտ և երջանիկ զուգադիպում…

«Հոբելյանական տոներին ամեն մի ժողովուրդ հանձին հոբելյարի, գալիս է հարգելու, պսակելու ինքն իրեն, իր շնորհքը, իր մտավոր – հոգեկան ուժերը, որ ընդունակ լինեն պատկառանք ներշնչելու ոչ միայն ազգի ընդհանրությանը, այլև օտարին»,- ասել է մեծ Թումանյանը: Ուրեմն, որքա՛ն մեծ է մեր ասելիքը, մեր որդիական խոնարհումն ու ակնածանքը, եթե հոբելյարը Վաղարշապատի առաքելահաստատ գահին արժանավորապես բազմած Հայոց Հայրիկն է` Ն.Ս.Օ.Տ.Տ. Գարեգին Երկրորդ ազգընտիր Հայրապետն Ամենայն Հայոց:

Հոբելյանական հրապարակումներում Վեհի եկեղեցաշեն , ազգանպաստ, հայրենանվեր գործունեության լուսաբանումը գալիս է փաստելու, որ մեր երանելի Հայրապետների ծառայության կերպը Քրիստոսի Եկեղեցուն և հայրենի երկրին նույնն է արդեն1700 տարի, քանզի նրանց Անձը Աբելի անարատ ընծան է Տիրոջը, և իրենք ջահակիրներն են հայոց ազգային – հոգևոր կյանքի, Ս.Գր. Լուսավորչի շնորհաբաշխ, մշտամնա ներկայության Վկաները Հայոց Տանը, միայն տարեթվերն են ուրիշ, միայն պատմական իրողություններն են այլ…

«Ես Հայրապետական գահ բարձրացա արցունքն աչքիս և վերքը սրտիս»,-դառնությամբ հիշում է Վեհը: Զարմանալի, առեղծվածային ճակատագիր Հայոց, - 1999 հոկտեմբեր 27-ի արհավիրք, և… Հուսո աստղ, որ նույն իսկ պահին ճառագեց Միածնաէջ Մայր Աթոռից` այս անգամ որպես Գարեգին Երկրորդ Հովվապետ Հայոց` Ծառայ Քրիստոսի, Հայոց անկախ պետականության կայացման դժվարին ու հակասական, ողբերգական ու հերոսական, և այսուհանդերձ, երջանի՛կ ժամանակների Հայրապետ, անկախության Հայրապետ…

…Օրերի մեջ պայծառ մի օր` Ք.ծ. 2009 հուլիս 29 –ի առավոտ: Հայրենի խոր կապույտ երկնքից Աստվածային լույսն է ծավալվում մայր քաղաք Երևանի Ս. Գր. Լուսավորիչ տաճարում: Հավատացյալների բազմությունը ալիքվում է, երփեղկվում. հոգևոր դասի շքեղ թափորի ուղեկցությամբ տաճար է մտնում Վեհը: Ժողովուրդը մղվում է դեպի Վեհափառը, համբուրում են Սրբազան Աջը, խաչը, շուրջառի քղանցքները, խնդրում և ստանում Հայրապետական օրհնություն… Օրը պատմական է, հուզիչ, աննախադեպ` մեր եկեղեցու 1700 –ամյա տարեգրության մեջ: Հանդիսապետությամբ Ամենայն Հայոց Հայրապետի, ներկայությամբ ՀՀ վարչապետի, պետական բարձրաստիճան այրերի, արտասահմանցի բազմաթիվ հյուրերի` Սուրբ և Անմահ պատարագ է մատուցում ԱՄՆ Հայոց Արևելյան Թեմի առաջնորդ Տ. Խաժակ արքեպիսկոպոս Պարսամյանը: Հընթացս սրբազան պատարագի` քահանա են ձեռնադրվում 27 սարկավագներ, որոնցից 9-ը կուսակրոն քահանայության արժանանալու ուխտ ունեն: -Վեհի գործունեության ամենապտղատու բաժինն է այս` ամրապնդել երկրիս հոգևոր ատաղձը, պատրաստել նվիրյալ հոգևորականներ` մերան ու շաղախ ազգային միասնության…Տաճարը լի է աղոթքով, սարսռուն երկյուղածությամբ, հավատավոր բազմությունն ըմբոշխնում է Աստվածային Զորության ներկայությունը սուրբ կամարների տակ, հայոց պատարագի վեհությանը միահյուսվում է ձեռնադրման աննկարագրելի խորհուրդը…Գերաշնորհ Սրբազանը ձեռնադրման կարգը ժամանակ առ ժամանակ ընդհատում է կարճ, կրակոտ քարոզախոսությամբ, ուր հայոց լեզուն իր հաղթանակն է տոնում…Հուզմունքը սաստկանում է. խոստովանության կարգն է, խոստովանողը Վեհն է. Հայոց Հայրիկը`գլխաբաց, ծունկի իջած մի Ուխտավոր… Այսպիսի մի պահի ներկա գտնվելու շնորհը կմաղթեի ամեն մի հայորդու… Ձեռնադրման կարգը շարունակվում է, Տ. Խաժակ Սրբազանը սրբալույս մյուռոնով օծում է սարկավագների ափերը. ինչքան հավատացյալներ պիտի խոնարհվեն, համբուրեն այս ձեռքերը` հաղորդվելու համար Աստվածային խորհրդին, քանի-քանի հայ մանուկներ այս ձեռքերով մկրտության ավազանից նորից պիտի ծնվեն… Վեհը մի աննկատելի շարժում արեց դեպի խորանը. Գերաշնորհ Սրբազանը Գարեգին անունն է շնորհում կուսակրոն քահանա ձեռնադրվող մի սարկավագի, որի ազնվական դեմքին, խոհուն աչքերում արտացոլվում է պահի լրջությունը, ինքնազոհաբերման վեհ խորհուրդը, Ուխտի ծանրության և լծի քաղցրության գիտակցումը…Ժպիտի մի ստվեր անցավ Վեհի դեմքով, պայծա՞ռ, թե՞, թվաց, խոնարհ աչքերով նայեց սարկավագին: Պատմության կրկնությու՞նը տեսավ դարերի մեջ, սուրբ նահատակների՞ն հիշեց`Ավարայրից  մինչև Սարդարապատ… Իրե՞ն հիշեց, 21-ամյա երիտասարդ սարկավագ` ուխտեց անմնացորդ, մի սուրբ կրակով այրվել Հայոց Եկեղեցու սրբալույս խորանին և, աշխարհին թողնելով ավազանի իր անունը, օծումով երկրորդ կյանք առավ Գարեգին անունով` դառնալու համար հետո զարդը մեր եկեղեցու և խոնարհ ծառան, մեր Մեծավորը և Փոքրավորը… Երբեք չպիտի մոռանամ ալեկոծ լռության այդ սրբազան պահը, Վեհի ժպիտի լուսաստվերները…

Գարեգին Երկրորդը իր ծննդյան 60-ամյակը դիմավորում է գործունեության իմաստուն ու արգասավոր շրջանի մեջ:

Ցանկանանք շնորհընտիր Հայրապետին արևշատություն, բազում տասնամյակների խաղաղ գահակալություն ու ծաղկուն գավազան` ի պայծառացումն ազգիս հայոց, ի հաստատություն Հայրենի երկրի և ի բարեզարդություն Հայաստանյայց Առաքելական Սուրբ Եկեղեցու` իր Միածնաէջ Մայր Աթոռով. ՔԱՆԶԻ Ի ՍՄԱ ԾԱԳԵԱՑ ՄԵԶ ԼՈՅՍ Ի ՀԱՅԱՍՏԱՆ ԱՇԽԱՐՀԻՍ…

Անահիտ ԹՈՐՈՍՅԱՆ

«Հայորդյաց տուն»



При полном или частичном использовании материалов ссылка на газету "Армянская Церковь" обязательна, при цитировании статьи в интернет-ресурсах гиперссылка на //armenianchurch.do.am обязательна.

Категория: Статьи
Всего комментариев: 0 Просмотров: 489

Читайте также:
Добавлять комментарии могут только зарегистрированные пользователи.
[ Регистрация | Вход ]
Категории каталога
Наша газета
Статьи [130]
Интервью [73]
Добро пожаловать на официальный сайт газеты "Армянская церковь" Ново-Нахичеванской и Российской Епархии Армянской Апостольской Церкви. Нашу газету можно приобрести в киосках церквей епархии. Издание выходит один раз в месяц, в цветном оформлении, по благословению главы Ново-Нахичеванской и Российской епархии ААЦ архиепископа Езраса. На нашем сайте вы сможете прочитать наиболее интересные материалы за прошлые номера, прочесть архивные выпуски газет, а также следить за выпуском газеты и ознакомиться с кратким содержанием очередного выпуска.


Газета «Армянская Церковь» © 2008-2014
Welcome on MerHayrenik.narod.ru: music, video, lyrics with chords, arts, history, literature, news, humor and more!Армянское интернет-сообщество Miasin.RuMARAGHAWebsite about Liberated Territory of ArtsakhAcher.ru - Армянский сайт для
 друзейSlaq.am